काठमाडौं (कास)– नेपाली नागरिकलाई भुटानी शरणार्थी बनाएर अमेरिका लैजाने प्रलोभन देखाएर ठगी गर्ने गिरोहका सदस्य सागर राई बुधबार ललितपुरको बालकुमारीबाट पक्राउ परेका छन् । पथरी–शनिश्चरे–१० का पूर्ववडाध्यक्ष राई कांग्रेसका निर्वाचित क्षेत्रीय प्रतिनिधि हुन् ।
भुटानी शरणार्थी बनाउने धन्दाका ‘नाइके’ केशव दुलालसँगै सानु भण्डारी र टेक गुरुङ आइतबार पक्राउ परेपछि आएको थप जाहेरीका आधारमा राई पनि समातिएको काठमाडौं उपत्यका अपराध अनुसन्धान कार्यालयले जनाएको छ । दुलालले पनि बयानमा राईको नाम मुछेको प्रहरी स्रोतले जनाएको छ ।
वडाध्यक्ष भएकै बेला राईले अमेरिका उडाउने सपना देखाएर मोटो रकम उठाउन थालेको पीडितहरूको भनाइ छ । गिरोहका नाइके दुलालका तर्फबाट पूर्वाञ्चल क्षेत्रको आर्थिक कारोबारको जिम्मा राईले लिएको उनीहरूको भनाइ छ ।
मउपत्यका अपराध अनुसन्धान कार्यालय स्रोतका अनुसार उक्त गिरोहको सञ्जालबाट ठगिएका कास्की, चितवन, काठमाडौंका एक सयभन्दा बढी पीडितले बुधबार सम्पर्क गरेका छन् ।२०७९ चैत १६ गते प्रकाशित